رسالة لن تصل
ياللي قلبك كان عليّا قاسي
إن كنت نسيت فأنا فاكر لسة مش ناسي
ياللي كانت عيونك بتبكي لما كنت ببكي
ياللي أنا كنت أول واحد تروحله لما تيجي تشكي
بعتني بكام ياللي كنت غالي عليك
دنا كنت هبيع دمي عشان خاطر عنيك
إن كنت نسيتني فأنا لسة فاكرك مش ناسيك
لسة باقي في قلبي شوية حب ليك
بشوفك كل يوم في أحلامي.. أصحى, أفتكر الحلم ابكي
مش لاقيك جنبي زي ماكنت بتشكيلي اشكي
اشكي مين لمين!.. اشكيك لنفسك؟!
وازاي تقسى على قلب كان اكتر قلب حسّك
بسهولة كدا بقيت هاين عليك
مابقتش فاهمك ولا عارف انا ايه بالنسبة ليك
كل يوم بكلمك.. وعارف إنك مش سامعني
أملي تفتكر مرة ذكرى.. وتصحّي قلبك اللي باعني
كل يوم بكلمك.. ومش سامع غير سكوتك
املي حلمي يوم يتحقق.. واسمع مرة صوتك
كلام وبكتبه.. عارف انه مش هيوصلّك
وأملي.. قلبك زي ما خدعك يدلّك
محمد صبري
هي مصر لونها ايه 
مصر لونها لون غراب
تمشي كتير فاكرها لمبة
وهى فى الاصل اصلا ضباب
فاكرها مية تجري تشرب
وتطلع في الأخر سراب
هتقولي وردي... قول
قول وسمعني صوتك
مانت لما بتشوف سوادها
مابنسمعش غير سكوتك
جي دلوقتى تقولي وردي... طب امشي
امشي عشان ماعكش فى الكلام
دانت دايق الذل اشكال والوان
فاكر من تلاتـــــــين سنة
ساعة ماكنت بترسملي فى احلام
عارف ساعتها قولتلك ايه
قولتلك انا جعان.. ايوة جعان
جعان مش لاقي حاجة تسد جوعي
جعان مش لاقي مية تطفي نار ضلوعي
جعان آمان مش لاقي حاجة اعملها في وش الظلم غير خضوعي
دنا يابني روحت لعم عبد الرؤوف
قولتله يا عم عبده هات بربع فول
قالى بذمتك مش مكسوف
بتقولها كدا عادي ووشك مكشوف
يا باي على الناس.. معندهمش احساس
لفيت بضهري وانا مستغرب
الواحد فى بلده وبين اهله وجيرانه ومتغرب
وجي تقولي لونها وردي
يابني شوف نفسك دانت لابس نضارة من غير عدسات
طب دنا اعرف واحد زيك مرة بص فى المراية طق مات
عتقولي نظرة مأسوية احاسيس سلبية مهلبية
دا مصر لونها لون غراب صوتها صوت غراب
مش عارف الواحد يعمل ايه فى البلد ديه
اهو عايشين بلا امل بلا هدف بلا هوية
يا عم سيبنى فى حالى.. ابوس ايدك سيبنى فى حالى
وماتصعبهاش عليا
M. Sabry
